जागीर खुस्काउने वेबसाइट

वेबसाइट हेर्न प्रतिबन्धित तुल्याएका केही घटना त नेपालमा घटेकै हुन् तर आफूले जागीर खाने अफिसको 'बोस'को आलोचना गर्दै वेबसाइटमा अनेक थोक लेख्ने जागीरेको जागीर चट हुन पुगेको छ । २० वर्षीय टम बीच आर्गोस कम्पनीमा काम गर्थे । उनलाई केही दिनयता काम गर्ने जाँगर चलिरहेको थिएन । जागीरबाट दिक्क लागेको एक दिन उनले फेसबुक वेबसाइट खोले र त्यहाँ लेखे- "म आर्गोस्मा काम गर्छु । अब म त्यहाँको जागीर एक रत्ति पनि सहन सक्तिन किनभने यो साँच्चिकै 'पाजी' अफिस छ ।"यसपछि रोचक के भयो भने त्यो म्यासेज राखिएको आधा घण्टामा नै उनका बोसले म्यासेज हेर्न भ्याएछन् । अनि उनलाई खबर पठाए कि त्यो म्यासेजले उनको माथा गरम गराइदियो । उनले त्यसलाई हटाइदिए बेस हुने थियो । त्यतिञ्जेलसम्म उनको त्यो म्यासेज तीन जनाले मात्र हेर्न भ्याएका थिए । सन पत्रिकाका अनुसार त्यसपछि प्रति घण्टा ७ पाउण्डको जागीर खाइरहेका टमलाई उनको बोसले जागीरबाटै बर्खास्त गरिदिए । उनलाई जागीरबाट निकाल्नुमा 'उपयुक्त व्यवहार नगरिएको' आरोप लगाइएको थियो । "यति सानो कुरामा मलाई निकालियो कि त्यसको कुनै जवाफै छैन", टमले पछि पत्रिकासँग कुरा गर्दै भने- "त्यो दिन मलाई साँच्चिकै रिस उठेको थियो । दिनभर काम गरेको थिएँ र मलाई ज्यादै कम तलब दिइएको थियो । यस्तो हुँदा कस्लाई पो रिस नउठ्ला !""यस्तो अवस्थामा मैले फेसबुक भेट्टाएँ । गल्ती मेरै हो कि त्यो म्यासेजलाई मैले सबैले देखून् भन्ने चाहेँ । मेरो फस्ट्रेशन किन अरुले थाहा पाउनु पर्दथ्यो र !", उनले बताए- "म यस्तो स्थितिमा थिएँ कि मेरो रिस आफ्नै साथीलाई पनि पोख्न सक्ने थिइनँ । त्यसैले फेसबुक एउटा असल साथी बनेको थियो । तर त्यो पनि हानीकारक साथी बन्यो ।"अब टम अर्को तयारीमा जुटेका छन् र सबै साथीहरुलाई त्यो सूचनाका कारण आफूले आर्गोस्को जागीरबाट हात धुनु परेको कुरा लेख्ने छन् । यता आर्गोसका प्रवक्ताले पनि उनको जागीर खोसुवामा परेको स्वीकार गरेको छ । प्रवक्ताले भने- "टमले हाम्रो कम्पनीको बेइज्जत इन्टरनेटमार्फत् गरेको छ । यो हाम्रा लागि सह्य कुरा हुँदै होइन ।"इन्टरनेट साथी हुन्छ भन्ने सुनिएको त थियो, तर जागीर खोसुवा दुस्मन पनि बन्न सक्तोरहेछ !

2007-08-16